Turmush — Нарын облусунун Ат-Башы районунда 23-апрель — Бүткүл дүйнөлүк китеп жана автордук укук күнү белгиленди.
Б.Кыдыкова атындагы Ат-Башы райондук моделдик-инновациялык китепканасында «Китеп — улуттук мурас, тарбиянын казынасы» аттуу адабий-музыкалык кече болуп өттү. Майрамдык кечеге жергиликтүү калемгерлер К.Ишеналиева, А. Акматова, К.Кожоев атындагы мектептин өнөрпоздору, «Маржан» бий тобу, Карыбек уулу Акматаалы атындагы мектептин окуучулары, айылдык китепканачылар жана китеп сүйүүчүлөр катышты.
Иш-чаранын алкагында коноктор үчүн китеп жана сүрөт көргөзмөсү уюштурулуп, китепкананын фондундагы баалуу эмгектер тааныштырылды. Окуучулар тарабынан көркөм окуулар жана кыргыздын салттуу «Акыйнек» айтышуусу аткарылды. Ошондой эле «Китеп — билим булагы, автор — эмгек ээси» аттуу сахналаштырылган оюн көрсөтүлдү. «Жеңиш» эс алуу багында «Китеп алмашуу» акциясы уюштурулуп, окурмандар өз ара китеп алмашууга мүмкүнчүлүк алышты.
Иш-чаранын негизги максаттары:
- өсүп келе жаткан муундун китеп окууга болгон кызыгуусун арттыруу;
- жаштардын руханий дүйнөсүн байытуу жана улуттук баалуулуктарды даңазалоо;
- автордук укук жана интеллектуалдык менчик тууралуу түшүнүктөрдү кеңейтүү;
- китептин коомдогу жана билим берүүдөгү ролун жогорулатуу.
- Бул күн 1995-жылы ЮНЕСКО тарабынан китептин, билимдин жана автордук укуктун маанилүүлүгүн даңазалоо максатында негизделген.