Turmush — Жумгал районунун борбору Чаек айылындагы күрөш залынын аба алмаштуу системасы «FORTEL» ЖЧКсы тарабынан жаңы желдетүүчү жабдууларга алмаштырылды.
Анын мүдүрү Адилет Бактыбек уулунун айтымында, бул күрөш залы Чаек балдар өспүрүмдөр спорт мектебине карайт. Бул жай долбоордо кандай көрсөтүлсө курулушчулар ошондой жасашкан. Курган компанияда күнөө жок.
«Күрөш залын өзүңүздөр билгендей аба алмашуу системасы талапка жооп бербей, балдар машыккан сайын тердеп, тер аба сыртка чыкпай дубалдарынын сырлары түшө баштаган эле. Залда аба алмашуу жетишсиз болгондуктан, ным топтолуп, имараттын ички бөлүгүнө да зыян келтирилген. Бирок мунун барын «FORTEL» ЖЧКсы кепилдик мөөнөтү бүткөнүнө карабастан өз эсебинен залды оңдоо иштерин жүргүзүп, заманбап желдетүүчү жабдууларды орнотуп, ички дубалдарын сырдап жакшы өңгө келтирип беришти. Ишканага ыраазычылык билдирем. Курулуш жаатында жергиликтүү бийлик тарабынан да калдык акча каражаттары которулбаса да, өз эсептеринен жасап, жакшы шарт түзүп беришти», - деди ал.
Машыктыруучу Жыргалбек Чоконоев учурда залдын ичине кадимкидей таза аба кирип калганын айтып сүйүндү.
«Мурда аябай кыйналыпбыз, чынында өзгөрүү бар. Долбоор жазгандар карап, анализдеп анан иш кылышса болмок экен. Фирма алар берген долбоор менен курушту да. Бирок ал мезгил өттү, азыр жакшы болуп калды. Балдарыбыз сүйүнүп жатышат. Мурда аба жетпей, тер жыт эшке чыкпай кыйналчубуз, эми кадимкидей салкын жел болуп, машыгууга да иштөөгө да жакшы болду. Курулушчуларга рахмат», - деди Чоконоев.
Күрөш залы 2023-жылы 33 млн сомго салынган. Анын узуну 36 метрди, туурасы 18 метрди түзөт. Учурда 400гө жакын бала машыгат.