Бөлүмдөр
Шаршемби, 19-сентябрь
Талас облусуТалас району 13.03.2018 22:36

Эл ичи — өнөр кенчи: Таластык 60 жаштагы Аскарбек аксакал 25 миң сомдук сүрөттөрдү тартат (фото)

Turmush -  Талас районунун Кум-Арык айылынын 60 жаштагы тургуну Аскарбек Исакеев көп жылдардан бери сүрөт тартып эмгектенет. Аймактык кабарчы сүрөтчү менен таанышты.

Анын айтымында, 1974-жылы Фурунзе шаарына барып, сүрөт окуу жайына тапшырган. Аскердик кызматын 2 жыл өтөп, окуусун 1980-жылы ийгиликтүү аяктап, сүрөтчү-жасалгалоочу кесибине ээ болгон. Үй-бүлөлүк шартынан улам Москвага окууга барбай калган. 1981-жылы айылга келип, Талас шаарындагы маданият үйүнө сүрөтчүлөр бригадасына кирип, шаардык майрам-кечелерде сүрөт тартып 1991-жылга чейин эмгектенген. Союз тарагандан соң Кум-Арык айылындагы орто мектепке сүрөтчү болуп жумушка орношуп, 10 жыл иштеген.

Кесиби сүрөтчү-жасалгалоочу болгондуктан турак үйлөрдүн ичин, Таластагы көп мекеме-уюмдардын ичин жасалгалаган.

«Талас облусунун көрүнүктүү сүрөтчүсү Жаныбек Рай сүрөт окуу жайына барганда мен 4-курста элем. Ал балага өз билгенимди үйрөтүп, насаатчысы болгом», - деди ал.

Сүрөттөрдү реализм жанрында тартат. Ага керектүү боекторду, калемдерди Бишкек, Казакстандагы Тараз шаарларынан алып келет. Ушул убакка чейин 60тан ашуун портрет, 1 миңден ашык пейзаж жана башка сүрөттөрдү тарткан. Эң кымбат сүрөтү 25 миң сомго сатылган. Эң чоң сүрөтүнүн узуну 2 метр, туурасы 4 метр болгон.

Өмүрлүк жубайы Гүлмира Исакеева менен 1982-жылы кино театрдан «Будь моим мужом» тасмасын көргөнү барганда таанышып, 1 жыл сүйлөшүп жүрүп баш кошушкан. Экөөнүн 2 кыз, 1 уулу жана 6 небереси бар. Ал сүрөтчүлүктөн тышкары дыйканчылык менен алектенет.

Бул макала Turmush басылмасынын интеллектуалдык жана автордук менчиги болуп саналат. Материалды сайттан көчүрүп алуу редакциянын жазма уруксаты менен гана мүмкүн.
Сиздин реакция: Эркек Аял
Күлкүлүү
Капалуу
Таң калуу
Ачуулануу
Необходимо авторизоваться
Комментарии
Для добавления комментария необходимо быть нашим подписчиком
×