Бөлүмдөр
Шейшемби, 18-декабрь
Нарын облусуАт-Башы району 19.02.2016 09:05

Элдик уламыштар: Бугу, марал байырлап, тал аралап суу аккан Ат-Башыдагы Талды-Суу айылынын тарыхы (фото)

Turmush -  Нарын облусунун Ат-Башы районундагы Талды-Суу айылы кыштак катары 1932-жылы түптөлгөн. Аталган айыл райондун борборунан 38 чакырым, Балыкчы темир жолунан 258 чакырым алыстыкта жайгашкан. Климаттык шарты катаал келип, кыш мезгили толук 5 ай өкүм сүрөт. Кар калың түшкөн учурда кыш 6 айга чейин созулат.

Жергиликтүү тургундар негизинен мал чарбасы менен алектенет. Мындан тышкары картошка айдап, арпа эгип дыйканчылык кылат.

2014-жылдагы болжолдуу эсеп боюнча 1300гө жакын калк жашайт. Талды-Суу айыл өкмөтүнө үч айыл: Өзгөрүш, Талды-Суу жана 1-Май айылы кирет.

Айылдын Талды-Суу деп аталып калышы сууга байланышкан. Аксакалдардын айтымында, айылды аралап өткөн суунун айланасына жалаң тал өсүп турган.

Талды-Суу айылында Богошту деп аталган жер бар. Ал жер аркылуу өткөн кылымдарда айыл жергесиндеги жут маалында бугулар Ак-Сай тарапка ашуу ашып кетиптир. Алардын арты менен айыл тургундары да ашуу ашып, Ак-Сайга жетишкен экен. Ошондон улам ал жер Бугу ашты болуп айтылып жүрүп, кийин Богоштуга айланган. Богошту Туюк-Богошту жана Жол-Богошту деп экиге бөлүнөт. Жол-Богошту менен ашуу ашы, Ак-Сай тарапка өтүп кетсе болот.

Богоштуда мектеп, китепкана, спорт аянтчасы, ат майданы, ФАП жана маданий иш-чаралар өтүүчү маданият үйү бар. Айылдагы жергиликтүү калк негизинен черик уруусунан тарагандар.

Талды-Сууга тиешелүү Ашуу-Төр, Орто-Төр, Чоң-Төр жана Чотон-Төр деген жайлар бар.

Айтылуу Ак-Сайга Ашуу-Төр аркылуу атчан киши беш саатта жетет. Талды-Суу айылынын аймагына Большевиктен бери келе жатканда Сары-Тал, Босого, Ак-Сайдын кырына чейинки жерлер кирет.

Бул макала Turmush басылмасынын интеллектуалдык жана автордук менчиги болуп саналат. Материалды сайттан көчүрүп алуу редакциянын жазма уруксаты менен гана мүмкүн.
Комментарии
Для добавления комментария необходимо быть нашим подписчиком
Көп окулду
×